Për pastrimin e borës pranon vetëm “has zviceranë dhe jo asi “me letra”

Shpeshherë nocioni “Eidgenosse” përdoret për të bërë diferencimin në mes të zviceranëve “autoktonë” dhe atyre të natyralizuar (që kanë marrë nënshtetësinë më vonë)

Keystone

Një firmë nga regjioni Oberburg-u, në shpalljen e saj për një punëtor e ka shkruar në mënyrë fare të qartë se ajo nuk dëshiron të punësojë të huaj. “Do të merren parasysh vetëm “Eidgenossen” (vendësit, zviceranët autoktonë) mund të lexohet në këtë shpallje.

Punëtori që kërkohet duhet të kryejë shërbimin dimëror, kështu qëndron e shkruar në shpallje por nuk ka asnjë detaj më tepër se për çfarë pune konkretisht bëhet fjalë, shkruan 20minuten.ch. Por, gazeta konsideron se firma kërkon një punëtor i cili, në rast nevoje, e pastron arealin e saj nga bora.

I pyetur lidhur me arsyen përse një person me prejardhje të huaj nuk është i pranueshëm për të, punëdhënësi nuk ka dashur të përgjigjet, transmeton albinfo.ch.

Për juristen Alma Wiecken nga Komisioni Federal kundër Racizmit është e qartë se këtu kemi të bëjmë e diskriminim. Mirëpo, shkelje me karakter racist do të kishte, sipas ligjit, vetëm në rast se do të përmendej shprehimisht ndonjë grup i cili do të përjashtohej, transmeton albinfo.ch. Në këtë rast duhej të ishte fjala për përjashtim nga mundësia e punësimit, për shkak të përkatësisë etnike, religjionit ose ngjyrës së lëkurës.

Edhe avokati Martin Steiger thotë se “nga kjo pikëpamje nuk ka mbrojtje nga diskriminimi. Por megjithatë, ky diferencim është i diskutueshëm nga ana politike dhe mund të kuptohet si qëndrim i ekstremit të djathtë”. Kjo shpjegohet edhe me faktin se shpeshherë nocioni “Eidgenosse” përdoret për të bërë diferencimin në mes të zviceranëve “autoktonë” dhe atyre të natyralizuar (që kanë marrë nënshtetësinë më vonë).