Gjysma e njerëzve besojnë se ekzistojnë jashtëtokësorët

Vetëm një çerek i pjesëmarrësve kanë deklaruar se nuk mendojnë se ka jetë inteligjente përtej Tokës

Gati gjysma e njerëzve në Tokë beson se nuk jemi të vetmit në univers, sipas një studimi të ri.

Një sondazh i fundit, i kryer në 24 shtete nga grupi “Glocalities”, ka treguar se 47 për qind e 26 mijë pjesëmarrësve “besojnë në ekzistencën e jashtëtokësorëve”.

61 për qind e tyre u përgjigj me “po” kur u pyetën nëse besojnë se ka në ndonjë formë jetë në planetet tjera, transmeton Albinfo.ch.

Në mesin e atyre që besonin se ka jetë përpos Tokës, 60 për qind thanë se do të donin të komunikonin me qeniet e tjera.

Vetëm një çerek i pjesëmarrësve kanë deklaruar se nuk mendojnë se ka jetë inteligjente përtej Tokës.

Rusët ishin populli që besonte më së shumti në jetën përtej Tokës me 68 për qind të pjesëmarrësve që kanë thënë “po”.

“Glocalities” mori për bazë intervistat në 15 gjuhë mes dhjetorit të vitit 2015 dhe shkurtit 2016 në shtetet që përfaqësojnë 62 për qind të popullatës së tokës dhe 80 për qind të ekonomisë globale.