Thaçi s’tërhiqet nga zhbërja e Gjykatës Speciale

Ai ka theksuar se nisma për shfuqizim “është plotësisht kushtetuese, ligjore dhe proceduralisht në rregull”

Presidenti i Kosovës, Hashim Thaçi, teksa nderoi të pagjeturit te përmendorja për ta, ka folur për nismën e deputetëve për shfuqizimin e speciales. Ai ka theksuar se nisma për shfuqizim “është plotësisht kushtetuese, ligjore dhe proceduralisht në rregull”.  “Unë nuk ju lë diçka në dorë, a as nuk ju marr diçka nga dora deputetëve. Ata janë të zotët e vetvetes, janë të zgjedhurit e popullit”, ka deklaruar presidenti kosovar.

Ai së bashkë me përfaqësuesit e familjeve të të pagjeturve, kanë bërë homazhe te Memoriali për të Pagjeturit në Prishtinë.

Presidenti Thaçi tha se për të pagjeturit do të diskutohet edhe në Bruksel në kuadër të dialogut Kosovë-Serbi dhe se kjo çështje do të mbyllet shumë shpejt.

“Do të punoj që çështja e të pagjeturve të shtrohet në të gjitha instancat, duke përfshirë dialogun në Bruksel. Autoritetet në Beograd, duhet të binden që të punojnë në fatin e të pagjeturve”, ka thënë Thaçi.

Këshilltari i kryeministrit Haradinaj, Jahja Lluka, ka folur për iniciativën që me ligj t’u sigurohen beneficione familjeve, që sipas tij, në vitin e ardhshëm do të dërgohet në Qeveri.