Kosova hap Ambasadë në Abu Dabi

Kosova do të hapë ambasadë edhe në Abu Dabi. Kjo është bërë e ditur gjatë vizitës së ministrit të Punëve të Jashtme i Kosovës, Behgjet Pacolli, i cili është takuar me ministrin e Jashtëm dhe i Bashkëpunimit Ndërkombëtar, Lartmadhëria e Tij, Sheikh Abdullah bin Zayed Al Nahyan.

Temë diskutimi, veç tjerash, ka qenë edhe hapja e Ambasadës së Kosovës në EBA, gjegjësisht në Abu Dabi, për çka është rënë dakord që ajo të nis procedurat e hapjes që nga java e ardhshme, përcjell albinfo.ch.

Në kuadër të këtij takimi, i cili u zhvillua në një ambient shumë miqësor, të dy kryediplomatët e shteteve respektive diskutuan mbi çështjet që prekin interesin e të dyja vendeve.

Gjatë takimit, Pacolli fillimisht e ka falënderuar homologun e tij Sheikh Abdullahun për, siç thuhet në komunikatën e MPJ-së, përkrahjen e vazhdueshme që Emiratet e Bashkuara Arabe kanë bërë dhe po e bëjnë për Kosovën, “jo vetëm në njohje, por edhe duke e përkrahur fuqishëm anëtarësimin e saj në organizatat ndërkombëtare”.

Në funksion të kësaj, është diskutuar edhe sinkronizmi i punëve të përbashkëta për anëtarësimin e Kosovës në INTERPOL, ku samiti i radhës i kësaj Organizate do të mbahet në Abu Dabi.

Në lidhje me çështjet e intensifikimit të bashkëpunimit ekonomik në mes dy vendeve, ministri i Jashtëm, Pacolli, përmes homologut të tij, i ka bërë thirrje investitorëve potencial nga EBA për të investuar në Kosovë, gjë e cila është mirëpritur dhe vlerësuar nga bashkëbiseduesi.