Petrit Çeku, intendant i festivalit të muzikës klasike “:alpenarte”

“Me Petrit Çekun, posti i intendantit është plotësuar me personin perfekt. Çeku i lindur në Kosovë në vitin 1985 konsiderohet si njëri ndër kitaristët më interesantë të kohës sonë..."

“:alpenarte-Festival” në Schwarzenberg (Austri) këtë vit e ka sezonin e vet të dytë ndërsa koncepti mbetet i njëjti. Bëhet fjalë për një festival “më ndryshe”, ose alternativ, të muzikës klasike.

Por të rinj janë drejtuesit e tij. Udhëheqës artistik është klarinetisti 31 vjeçar Sebastian Manz. Ndërsa intendant (“intendent in Residence”) i festivalit, gjegjësisht i katër koncerteve që do të mbahen në muajin prill, është Petrit Çeku, shkruan vol.at.

Kitaristi nga Kosova, pritet të vendosë fokusin e festivalit në instrumentin e tij. Funksioni që i është besuar atij ka të bëjë me sezonin pranveror të festivalit (prill), ndërsa sezoni vjeshtor mbahet në vjeshtë, transmeton albinfo.ch. “Histoire du Tango” do të jetë si një pe i kuq që përshkon koncertin e hapjes.

Në mbrëmjet e radhës në program janë krijime të Mocartit e të Bethovenit ashtu sikurse edhe vallet popullore rumune të Bela Bartokut dhe “Junglebook-Medley”.

“Me Petrit Çekun, posti i intendantit është plotësuar me personin perfekt. Çeku i lindur në Kosovë në vitin 1985 konsiderohet si njëri ndër kitaristët më interesantë të kohës sonë. Ai e bën kitarën të prezantohet në një dritë krejtësisht tjetër”, thotë Manze, transmeton albinfo.ch.

Duke qenë se repertori i krijimeve peër kitarë në literaturën muzikore klasike të perëndimit nuk është aq i pasur, Çeku dhe Manze kanë bërë aranzhimin e shumë nga krijimet që do të interpretohen në festival dhe që do të dëgjohen për herë të parë aty. “Aranzhimet e bëra për `alpenarte` tregojnë se si është dukur bota muzikore në shekullin 16, para se të zbulohej pianoja”, ka thënë kitaristi i shquar, Petrit Çeku.