Ajri i ndotur, formohet një Task Force ndërministrore

Minstrja Reshitaj, duke paraqitur shqetësimin e qytetarëve të Kosovës, veçanërisht të Prishtinës, tha se si ministri kanë kërkuar angazhim e dikastereve përgjegjës për këtë çështje, andaj kërkoi nga Qeveria që t’i përkrahin në vendimet dhe aktivitetet në bazë të planit të miratuar muaj më parë

Keystone (AP Photo/Visar Kryeziu)

Ekzekutivi kosovar ka filluar ta marrë më seriozisht ndotjen e ajrit në kryeqytet. Në mbledhjen e sotme është votuar formimi i një Task Force ndërministrore, që ka për qëllim të merren masa të veçanta në mbrojtje të ajrit, transmeton albinfo.ch.

Ministrja e Mjedisit dhe Planifikimit Hapësinor, Albena Reshitaj, duke paraqitur shqetësimin e qytetarëve të Kosovës, veçanërisht të Prishtinës, tha se si ministri kanë kërkuar angazhim e dikastereve përgjegjës për këtë çështje, andaj kërkoi nga Qeveria që t’i përkrahin në vendimet dhe aktivitetet në bazë të planit të miratuar muaj më parë. Ajo shtoi se janë në koordinim me Komunën e Prishtinës që të bëjmë reduktimin e automjeteve në pjesë të kryeqytetit ku niveli i ndotjes është më i lartë.

Megjithatë, nga kërkesat e saj, kryeministri Haradinaj vendosi vetëm për Task Forcën. “Sot mund të dakordohemi për krijimin e kësaj Task Force, besoj që duhet ta udhëhiqni ju, ministre dhe mund ta aprovojmë, besa edhe ndërinstitucionale nëse nevojiten edhe agjenci ose kompani publike, siç është rasti i KEK-ut, që përfshihen të gjithë me përgjegjësitë e veta“, ka deklaruar kryeministri.