Sërish zgjedhje në 5 komuna të Kosovës

Arsyet për anulim të votimit në këto qendra votimi është thënë të jenë parregullsitë e kontatuara më 12 dhjetor

Zgjedhjet do të përsëriten në 21 qendra votimi të përfshira në pesë komuna të Kosovës. Për anulimin e votimeve ka vendosur Paneli Zgjedhor për Ankesa dhe Parashtesa. Arsyet për anulim të votimit në këto qendra votimi është thënë të jenë parregullsitë e kontatuara më 12 dhjetor dhe, si të tilla, procesi i votimit në këto qendra nuk mund të konsiderohet i vlefshëm.

PZAP-i ka urdhëruar KQZ-në që të shkohet në rivotim në 12 qendra votimi në Skenderaj, në 5 në Drenas, 1 në Malishevë, 2 në Deçan dhe 1 qendër votimi në Lipjan. PZAP-i ka urdhëruar KQZ-në që të bëjë ndërrimin e komisionarëve të qendrave të votimit dhe të shtojë mbikëqyrjen e procesit të rivotimit.

Pas këtij vendimi të PZAP-it, Komisioni Qendror i Zgjedhjeve ka miratuar vendimin që në këto komuna votimet të ripërsëriten më 9 janar të vitit 2011. Lajmin e bëri të ditur për mediat e Kosovës, kryetarja e Komisionit Qendror të Zgjedhjeve, Valdete Daka.