Gashi: Pagesa online për kartonin e gjelbër, çështje javësh

Gashi ka thënë se është duke u punuar edhe në eliminimin e tërësishëm të kësaj pagese, por ka shtuar se si proces mund të marrë kohë

Ilustrim

Ministri i Diasporës, Dardan Gashi, ka thënë se pagesa online për kartonin e gjelbër që do të evitojë pritjet e gjata në kufi, është vetëm çështje javësh kur edhe do të fillojë së funksionuari.

Ai  gjatë ditës së sotme ka vizituar qytetin e Stutgardit në landin e Baden Württembergut ku jetojnë rreth 120 mijë shqiptarë ku edhe është pritur nga përfaqësues të shoqatave nga qytete të ndryshme.

Gashi ka thënë se është duke u punuar edhe në eliminimin e tërësishëm të kësaj pagese, por ka shtuar se si proces mund të marrë kohë.

Ai i informoi për proceset nëpër të cilat po kalon Ministria e Diasporës në këtë moment, si dhe për planet në të ardhmen e afërt që pritet të jetësohen në bashkëpunim edhe me Ministrinë e Diasporës të Shqipërisë sipas marrëveshjeve të nënshkruara.

“Shumë shpejt, ne do të emërojmë një person përfaqësues të Ministrisë tonë në Ambasadën e Kosovës në Berlin, i cili do të merret ekskluzivisht me kërkesat dhe shqetësimet tuaja, pra do të jetë personi kontaktues për ju. Kjo do ta bëjë shumë të lehët edhe bashkëpunimin dhe komunikimin mes nesh”, citohet të ketë thënë  Gashi. Në këtë land, Ministri Gashi ndaloi tek shkolla shqipe në Eppingen ku mori pjesë në hapjen e modulit të dytë të trajnimit për mësimdhënësit e gjuhës shqipe në këtë land, e që modul është i certifikuar edhe nga enti shkollor i qytetit të Heilbronn.

“Jam i gëzuar që shoh se mësimdhënësit këtu së bashku me autoritetet gjermane kanë arrit këtë nivel të mësimit konsullor të gjuhës shqipe, dhe është tejet inkurajuese kjo që po e shoh”, u shpreh Gashi. Diaspora gjermane është kontribuuesi më i madh në Kosovë më anë të remitancave të cilat arrijnë shumën e rreth 350 milionë EUR në vit, ndërsa po ashtu prin edhe me shumën e investimeve të bëra në Kosovë nga afaristët shqiptaro-gjermanë. ​