Ndryshime në ligjin mbi të huajt dhe integrimin

Këshilli mban qëndrim që të huaj të caktuar duhet që në mënyrë të detyrueshme të zotërojnë njërën nga gjuhët e vendit

Këshilli Federal (qeveria) me rastin e ndryshimit të planifikuar të Ligjit mbi të huajt dhe integrimin është detyruar që edhe njëherë të rishikojë lëndën. Bëhet fjalë që në të ardhmen kantonet të kenë më shumë kompetencë për zhvillimin e programeve për integrimin e të huajve. Kostoja e gjithë kësaj është vlerësuar me 110 milionë franga në vit.

Pas këshillimit të kryer, Qeveria Federale ka ardhur në përfundimin se kantoneve të vazhdohet tu lihet në kompetencë nëse ato do të marrin masa speciale për të huajt me vështirësi integrimi. Ndryshimi tjetër është se, nuk parashihet që, si më parë, integrimi të rishqyrtohet në mënyrë sistematike për çdo vjet.

Por Këshilli mban qëndrim të prerë që të huaj të caktuar duhet që në mënyrë të detyrueshme të zotërojnë njërën nga gjuhët e vendit. Në të kundërtën, atyre do të mund tu merret leja e qëndrimit në Zvicër.