Procedura 48 orëshe, “ilaç” për azilkërkuesit nga Ballkani

Gjatë gjysmës së dytë të gushtit, të gjitha kërkesat për azil nga këto vende, të marra së bashku kanë qenë gjithsej 70

Shkurtimi i procedurave të azilit për azilkërkuesit nga vendet e Ballkanit ka filluar të tregojë rezultate. Gjatë muajit gusht, për herë të parë nga koha e heqjes së detyrimit për viza, është shënuar një rënie e ndjeshme e numrit të kërkesave për azil nga vendet si Bosnjë Hercegovina, Maqedonia, Serbia dhe Shqipëria.

Të kujtojmë, për azilkërkuesit nga vendet në fjalë, nga 20 gushti është futur në veprim vendimi sipas të cilit procedura e azilit deri në përgjigjen e instancës së parë zgjat vetëm 48 orë.

Kështu, gjatë gjysmës së dytë të gushtit, të gjitha kërkesat për azil nga këto vende, të marra së bashku kanë qenë gjithsej 70. Ndërsa, siç njofton Enti Federal për Statistikë, në gjysmën e parë të gushtit kanë qenë 274 persona nga vendet e Ballkanit që kanë kërkuar azil në Zvicër.

Krahas kësaj, një numër dukshëm më i madh se më parë i azilkërkuesve nga këto vende, nga 20 gushti e këndej ka vendosur për kthim vullnetar. Bëhet fjalë për 432 veta që janë kthyer në vendet prej nga kanë ardhur, bëjnë të ditur gazetat “SonntagsZeitung” dhe “Le Matin Dimanche”, duke iu referuar burimeve nga Zyra Federale për Migracion.

Sipas këtyre burimeve, në muajt paraprakë vullnetarisht janë kthyer një numër dukshëm më i vogël i azilkërkuesve nga Ballkani. Kjo shpjegohet me faktin se personave që nuk kthehen me kohë dhe vullnetarisht, u ndalohet ardhja e sërishme në Zvicër për një kohë të caktuar. Në një situatë të tillë, shumica, dhe sidomos të rinjtë, nuk duan të rrezikojnë.

Vendimi për shkurtim të procedurës në vetëm 48 orë, është vënë në veprim në 159 raste gjatë tri javëve sa ka hyrë në funksion. Brenda kaq orëve azilkërkuesit nga Ballkani duhet të marrin vendimin e instancës së parë, i cili në shumicën absolute të rasteve është vendim për mohim të të drejtës për azil.

Shtimi i madh i kërkesave për azil i shënuar në muajt e kaluar, ka qenë shkak për marrjen e një vendimi të tillë.

 

---