Basha: S’do të lejoj kurrë instalimin e autokracisë në vend

Lulzim Basha tha se kjo protestë nuk bëhet për të ardhur në pushtet, por opozita sipas tij nuk do të lejojë kurrë instalimin e autokracisë në vend

Edhe pse ishte thënë se protesta e opozitës në Tiranë do të jetë paqësore ashtu nuk ndodhi. Pas përfundimit të fjalës së kreut të Opozitës, Lulzim Basha, disa qytetarë kanë hedhur tymues në drejtim të policisë para ndërtesës së Kryeministrisë në Tiranë e po ashtu gjuajtën edhe me vezë, ndërsa përplasje mes policisë dhe protestuesve pati edhe tek ndërtesa e Ministrisë së Brendshme e cila vazhdoi për një kohë më të gjatë.

Disa protestues janë lënduar gjatë përleshjeve. Është dashur që aty të shkojë kreu i PD-së për ti tërhequr protestuesit nga aty.  Basha në fjalimin e tij theksoi se problemi që ka sot Shqipëria është mungesa e demokracisë, rënia e shtetit të së drejtës dhe shteti i kapur nga krimi e korrupsioni. Ai bëri thirrje për bashkim popullor dhe ngritje kundër kësaj të keqeje që ka kapluar vendin, për të cilën sipas tij ka vetëm një rrugë “largimi i kësaj qeverie nga populli i bashkuar”.

Lulzim Basha tha se kjo protestë nuk bëhet për të ardhur në pushtet, por opozita sipas tij nuk do të lejojë kurrë instalimin e autokracisë në vend. “Sot më shumë se kurrë sytë tanë kërkojnë dritën që vjen nga Perëndimi, edhe pse ajo shkëlqen nga larg. Sot jemi mbledhur me qindra mijëra për të treguar se jemi evropianë. Sot nga ky shesh i mbushur si kurrë më parë, ne dëshmojnë se nuk pranojmë autokracinë, se nuk mbyllim sytë përpara drogës”, deklaroi Basha. Ai tha se aksioni popullor do të vazhdojë nga çlirimi i qeverisë siç e quajti ai autokrate.

Pavarësisht se nuk foli në podium, në një prononcim për median, kryetarja e LSI-së Monika Kryemadhi tha se kërkojnë largimin e kryeministrit Edi Rama, pasi sipas saj skandali Xhafaj është vetëm një pikë “në oqeanin e zullumit të Edi Ramës”.