Meta dekoron Kardinalin Troshani me titullin “Gjergj Kastrioti Skënderbeu”

Presidenti i Shqipërisë, Ilir Meta, dekoroi me titullin më të lartë, “Gjergj Kastrioti Skënderbeu”, Kardinalin Ernest Simon Troshani, në ceremoninë e cila u zhvillua në Kishën e Shën Andonit në Laç.

Presidenti Meta e vlerësoi Kardinalin Troshani si simbol të rezistencës dhe përkushtimit të pashembullt ndaj vlerave dhe idealeve kombëtare, përcjell albinfo.ch.

“Kjo dekoratë me emrin e madhështorit dhe të pavdekshmit, Heroit tonë Kombëtar, shqiptarit më të gjallë ndër të gjallët, siç do të shprehej Fan Noli, i jepet sot Kardinalit Troshani, si përfaqësues i brezit të jashtëzakonshëm të klerikëve katolikë që jetën ua kushtuan besimit të palëkundur ndaj Zotit, dashurisë së pakushtëzuar ndaj njerëzve, vlerave të larta shpirtërore dhe morale, lirisë së ndërgjegjes dhe qëndresës dinjitoze në shërbim dhe respekt të atdheut dhe kombit”, ka thënë Meta.

Kardinali Ernest Simon Troshani është një nga dëshmitarët e fundit të gjallë të gjeneratës së klerikëve shqiptarë që u persekutuan mizorisht.