Në vjeshtë do të ketë aksion gjithëpërfshirës për pastrimin e Kosovës

Haradinaj theksoi se gjendja në Kosovë nuk është e kënaqshme sa u përket çështjeve mjedisore, por ky është momenti i fundit kur ne duhet të reagojmë

Kryeministri Ramush Haradinaj në ditën e parë të konferencës së nivelit të lartë mbi Zhvillimin e Qëndrueshëm ka paralajmëruar se gjatë kësaj vjeshte do të organizohet një aksion gjithëpërfshirës për pastrimin e Kosovës nga mbeturinat.

“Ftoj të gjithë, institucionet e BE-së, të gjithë partnerët, KFOR-in, FSK-në, Policinë, Zjarrfikësit, njësitë rajonale dhe regjionale të pastrimit të mbeturinave që të bëhen bashkë dhe në vjeshtë ta bëjmë një pastrim gjeneral në Kosovë prej mbetjeve nga mbeturinat që janë bërë qe 20 vjet”, ka thënë Haradinaj.

Ai theksoi se gjendja në Kosovë nuk është e kënaqshme sa u përket çështjeve mjedisore, por ky është momenti i fundit kur ne duhet të reagojmë, transmeton albinfo.ch.

Përfaqësuesja e posaçme e BE-së në Kosovë, Natalyia Apostolova, tha se resurset natyrore të Kosovës janë të limituara dhe duhet të shfrytëzohen në mënyrë të duhur. E ministrja e Mjedisit dhe Planifikimit Hapësinor, Albena Reshitaj, shtoi se është hera e parë që jo vetëm në Kosovë, por edhe në rajon, po organizohet një konferencë e tillë që i dedikohet mjedisit.