Ambasadori amerikan i kërkon Zvicrës sanksione për Iranin

"Perpjekjet që me joshje ekonomike Irani të shmanget nga provat bërthamore, kanë dështuar. Pas "kulaçit" tash është radha e kërbaçit"

Zvicra do të duhej të merrte masa më të ashpra, përfshirë edhe sanksione, ndaj Iranit. Kështu mendon ambasadori i SHBA-së në Zvicër Donald Beyer. Ai, në një intervistë dhënë gazetës “Basler Zeitung” ka kërkuar që Zvicra t`i bashkohet sanksioneve që ka vendosur ndaj Iranit Bashkimi Evropian.

Sipas tij, përpjekjet që me joshje ekonomike Irani të shmanget nga provat bërthamore, kanë dështuar. Prandaj, pas “kulaçit” tash është radha e kërbaçit, ka thënë ai.

Ambasadori më tutje ka thënë se përveç Zvicrës, të gjitha shtetet e Evropës mbështesin sanksionet e vendosura nga BE ndaj Iranit . Ndërkohë, Zvicra mbështet vetëm sanksionet e OKB-së ndaj Iranit, që janë më të buta se ato të Bashkimit Evropian.