Rita ambicioze: dëshiron të studiojë!

Ajo u ka premtuar prindërve se, para se t`i kushtohet muzikës, do të mbarojë shkollimin universitar

Ndonëse aktualisht është në vlugun e punës për të bërë depërtimin final në skenën e muzikës boterore, këngëtarja londineze me rrënjë shqiptare, Rita Ora nuk heq dorë nga synimi që të kryejë studimet në një universitet.

Ajo thotë se u ka premtuar prindërve se, para se t`i kushtohet karrierës muzikore, do të përfundojë shkollimin universitar.

Në një intervistë që ka dhënë për një televizion Rita Ora, sipas contactmusic.com ka thënë: “Kam lidhur kontratë që në moshën 18 vjeçare. Dhe, në atë kohë duhej përcaktuar: ose do të kryeja fakultetin ose të vazhdoja me muzikë dhe ta shtyja për më vonë diplomimin në universitet. Unë i kam premtuar babait se do ta përfundoj universitetin dhe këtë do ta bëj me siguri”, ka thënë Rita ambicioze.

Por aktualisht nuk duket shumë realiste që ajo të ulet në bankat e amfiteatrove të universitetit. E ndjekur nga sukseset që po i arrin me këngët e publikuara dhe me angazhimet jo të lehta që ia imponon kontrata me Jay-Z, Rita do ta ketë të vështirë të gjejë kohë për të studiuar.