Kosova i bën ftesë Shabanit

19-vjeçari ende nuk ka vendosur për të ardhmen e tij, derisa nuk ka luajtur për Gjermaninë

Meritan Shabani është një prej yjeve shqiptar që po shkëlqen në arenën ndërkombëtare. Edhe pse vetëm 19-vjeçar, ai gjithnjë e më shumë po ka hapësirë në Bayern Munich.

Së fundi, Shabani shënoi për gjermanët në ndeshjen kundër Manchester Cityt, derisa luajti edhe kundër PSG-së dhe Juventusit.

Bajram Shala, menaxher për media dhe licencime në Federatën e Futbollit të Kosovës ka treguar se ata janë në kontakte të vazhdueshme më familjarët e Shabanit.

“Po, ka shumë kohë që jemi në kontakt me familjarët e Meritanit”, ka thënë ai për Gazetën Express, përcjell albinfo.ch.

“Ata kërkojnë që të mos nguten dhe fillimisht duan ta shohin sesi po zhvillohet Meritani e më pas të marrin një vendim”.

Sipas Shalës, FFK-ja do të bëj gjithçka që do të jetë e mundur që ta këtë në radhët e saj yllin që është duke u rritur nga akademia e Bayernit në Gjermani.

“Ne ua kemi bërë të qartë që jemi të gatshëm të bëjmë gjithçka që është e mundshme që Meritani të përcaktohet dhe të luaj për Kosovën”.

Ndryshe, në karrierën e tij Shabani ka pasur vetëm një paraqitje për Gjermaninë Junior apo U15, ndërkaq ai nuk është ftuar as nga Gjermania U19 dhe as nga Gjermania U21.

I lindur më 15 mars 1999, Shabani ka edhe një paraqitje në Bundesligë që e pati vitin e kaluar.

Ai po ashtu ka pasur paraqitje të rregullta më skuadrën Bayern U19 me të cilën është bërë kampion vitin e kaluar.