Thaçi: Korrigjimi i kufijve deri në pranverën e ardhshme

Presidenti i Kosovës, Hashim Thaçi ka thënë se deri në pranverën e ardhshme Kosova do të arrijë marrëveshje me Serbinë, sa i përket korrigjimit të kufijve.

Këto deklarata Thaçi i ka dhënë në një intervistë për televizionin francez, “Frans 24”, përcjell Albinfo.ch.

Presidenti Thaçi ka thënë se ndryshimi i kufijve nuk është ideja që ai dëshiron ta prezantojë, por  që sipas tij pas negociatave të deritanishme, kjo është zgjidhja e vetme e mençur për stabilitetin mes Kosovës dhe Serbisë.

Sipas tij marrëveshja do të duhet të përmbajë njohjen e Kosovës dhe anëtarësimin e saj në Këshillin e Sigurisë së Kombeve të Bashkuara.

“Ideja ime për korrigjim të kufijve ndërmjet Republikës së Kosovës dhe Serbisë, nëse nuk do të nënkuptonte arritjen e një marrëveshjeje përfundimtare me njohje reciproke dhe anëtarësimin e Kosovës në OKB, në fakt sfidon rreziqe tjera të ndarjes së Kosovës apo themelimit të Asociacionit të Komunave me shumicë serbe që nënkupton “Republika Sërpska”.  Prandaj mendoj se kjo zgjidhje është reale dhe do të duhet të jetë e pranueshme për të dy palët, por natyrisht e mirëpritur edhe nga bota demokratike.” ka thënë Thaçi.