20-vjetori i krijimit të Forcave Speciale

“20 vjet duken pak, por nuk është pak ajo çfarë Forcat Speciale i kanë dhënë dhe vijojnë t’i japin historisë së Forcave tona të Armatosura dhe vendit tonë”, kështu e ka nisur fjalimin ministrja e Mbrojtjes së Shqipërisë, Olta Xhaçka, e cila vlerësoi maksimalisht kontributin 20-vjeçar të Forcave Speciale.

Ajo tha se kjo trup është një aset kombëtar duke shtuar se këta djem janë krenaria e Forcave të Armatosura dhe krenaria e vendit, përcjell albinfo.ch.

“Janë heronj të heshtur për të cilët flet vetë historia. Falë tyre flamuri ynë është valëvitur krenar, përkrah flamujve të aleatëve tanë, në teatrot më të vështira të operacioneve, që nga Mosuli i largët deri tek Kandahari i frikshëm. Forcat tona Speciale do të kenë vëmendjen dhe mbështetjen tonë. Këta djem duhet të trajtohen ashtu siç e meritojnë dhe kjo forcë të modernizohet më tej”, ka thënë ministrja.

Në këtë përvjetor përveç zyrtarëve institucional morën pjesë edhe familjarët e pjesëtarëve të këtij batalioni. Me këtë rast, u ekspozuan armatimet, pajisjet dhe mjetet që ka në përdorim batalioni i Forcave Speciale, ku gjithashtu fëmijët ishin frekuentuesit më të mëdhenj.