Takohen biznesmenët e diasporës

Ministria e Diasporës e Republikës së Kosovës ka mbledhur bashkë në një takim në Istog të Kosovës bizneset e diasporës

Takimi vjetor, që mëton të jetë tradicional, po mbahet në kompleksin turistik “Trofta”,  në Istog në praninë  e më shumë se 100 biznesmenëve që kanë investuar kapitalin e tyre në Kosovë.

Në fillim të këtij takimi, kryetari i komunës së Istogut, Haki Rugova, si nikoqir, i falënderoi të pranishmit.Ai tha se ndihet mirë që ky takim për herë të parë po mbahet në Istog,  aq më tepër në kompleksin “Trofta”, si shembull i mirë i privatizimit në Kosovë, në të cilin ka investuar mërgimtari ynë, Ismajli Bytyqi, nga Belgjika.

Sipas tij, duhet një bashkëpunim më i mirë ndërmjet nivelit lokal dhe atij qendror që të përkrahen dhe të promovohen bizneset nga diaspora, thuhet në një njoftim për media të MeD.

“Diaspora kosovare ka potencial të fuqishëm jo vetëm financiar, por edhe profesional në zhvillimin e Kosovës. Deri tani, remitencat e dërguara  kryesisht janë shfrytëzuar për konsum, ndërsa qëllimi ynë mbetet që këto dërgesa të kanalizohen dhe të kontribuojnë direkt në zhvillimin e vendit. Mërgata jonë, siç e dha dje kontributin kryesor  për çlirimin dhe lirinë e vendit, sot po e bart peshën kryesore në zhvillimin e tij”, tha në fjalën e tij, ministri i Diasporës, Ibrahim Makolli.

Sipas tij, investimet e mërgatës kanë qenë të ndryshme.  “Jam i vetëdijshëm që ka sfida të të bërit biznes në Kosovë, por sot Kuvendi është duke e miratuar  një pako, e cila parasheh lehtësira të të bërit biznes, me theks të veçantë kjo do t’u jepte ndihmë të madhe investitorëve nga diaspora, të cilët, sipas statistikave, përafërsisht  sjellin në Kosovë nga 400 – 700 milionë euro në vit, të cilat  shfrytëzohen për konsum, por edhe për edukim, shëndetësi etj.”, theksoi ndër të tjera ministri Makolli.

Në përfundim të fjalës së tij,  ministri Makolli u uroi punë të mbarë  pjesëmarrësve të këtij takimi. Ai garantoi se MeD do të jetë avokat i nevojave të bizneseve dhe urë lidhëse mes bizneseve të diasporës dhe institucioneve të Kosovës.

 Me një fjalë rasti, të pranishmëve  iu drejtua edhe Eroll Belegu, nga Oda Ekonomike Amerikane. Ai tha se po bëhet punë e mirë në promovimin dhe përkrahjen e bizneseve nga diaspora. “Gjërat janë premtuese, sepse në tre vjetët e fundit bizneset në Kosovë janë rritur për 30 %, që nënkupton rritje pune, rritje kapitali, shtim  të vendeve të punës etj.”, u shpreh Belegu.

Takimi po e vazhdon punën sipas agjendës. Parashihen diskutime të gjera mes shoqatave dhe asociacioneve të biznesit në Kosovë dhe bizneseve nga diaspora në krijimin e kontakteve, dhënien e ideve dhe bashkëpunimit mes bizneseve të diasporës që operojnë në vend dhe atyre në diasporë.