Mundësitë që ofron Kosova për të investuar

Ministria e Tregtisë dhe Industrisë së Kosovës përmes Agjencisë për Investime dhe Përkrahjen e Ndërmarrjeve në Kosovë (KIESA), në bashkëpunim me Ministrinë e Punëve të Jashtme, Ministrinë e Diasporës dhe Investimeve Strategjike, Ambasadën e Republikës së Kosovës në Romë dhe Konsullatën e Përgjithshme të Republikës së Kosovës në Milano, më 10 nëntor në Milano të Italisë organizuan Sesionin informues “Klima e investimeve në Kosovë” me bizneset e diasporës shqiptare në Itali.

Në këtë sesion informues, nga Ushtruesi i detyrës së Drejtorit të Përgjithshëm të KIESA-s, Nol Buzhala, bizneset pjesëmarrëse u njoftuan për shërbimet e KIESA-s si dhe për kushtet dhe mundësitë që ofron Kosova për të investuar, përcjell albinfo.ch.

Gjatë sesionit u bënë prezantime edhe nga përfaqësues të Administratës Tatimore, Ministrisë së Diasporës dhe Investimeve Strategjike si dhe Agjencisë Kosovare të Privatizimit.

Derisa Kreshnik H. Thaqi, Udhëheqës i sektorit për promovim të investimeve në KIESA, para të pranishmëve prezantoi sektorët potencial për investime në Kosovë.

Pas sesionit përfaqësuesit e KIESA-s kanë zhvilluar takime me bizneset pjesëmarrëse ku janë dhënë sqarime rreth fushave të cilave kanë shprehur interesim.