Papunësia në Zvicër, në nivelin më të ulët në dekadën e fundit

Ndërkohë, norma mesatare e papunësisë së të rinjve në vitin 2018 ishte 2.4 për qind, 0.7 për qind më pak se një vit më parë

Norma mesatare mujore e papunësisë në Zvicër vitin e kaluar ishte 2.6 për qind, shifra më e ulët në dhjetë vjetët e fundit, sipas të dhënave të publikuara nga Sekretariati Shtetëror për Çështjet Ekonomike (SECO).

Shkalla mesatare mujore e papunësisë në vitin 2017 ishte 3.2 për qind, ndërsa në vitin 2016 kjo shifër ishte 3.3 për qind, shkruan “The Local”.

Në një deklaratë, SECO bëri të ditur se shifrat e vitit 2018 treguan se ekonomia zvicerane dhe tregu i punës janë si kurrë më parë, përcjell albinfo.ch.

Shifrat tregojnë se mesatarja mujore për numrin e njerëzve të regjistruar si të papunë me zyrat e vendit të punës vitin e kaluar ishte 118,103.

Ndërkohë, norma mesatare e papunësisë së të rinjve në vitin 2018 ishte 2.4 për qind, 0.7 për qind më pak se një vit më parë, përcjell tutje albinfo.ch. Shkalla e papunësisë për muajin dhjetor ishte 2.7 për qind, ose 2.4 për qind pas rregullimit sezonal.

Nga 119,661 njerëz të regjistruar që kërkojnë punë në fund të muajit të kaluar, 51,1 për qind ishin zvicerane, ndërsa 48,9 për qind ishin shtetas të huaj, transmeton albinfo.ch.

Gjithsej 15,993 njerëz – ose 13.4 për qind e të gjithë punëkërkuesve të regjistruar – kishin qenë të papunë për të paktën 12 muaj.

Bum ekonomik

Shifrat treguan se ekonomia zvicerane është e qëndrueshme dhe se tregu i punës është në formë të mirë, sipas SECO, shkruan albinfo.ch. Numri i të papunëve ra ndjeshëm deri në korrik, pas së cilës mbeti në një nivel të ulët. Nga nëntori, efektet sezonale çuan në një rritje të të papunëve.

Në fund të dhjetorit, në Qendrat Rajonale të Punësimit (RAV) u regjistruan 119,661 persona. Kjo ishte 9,187 më shumë krahasuar me muajin nëntor. Shkalla e papunësisë në këtë mënyrë u rrit me 0.2 pikë përqindjeje, në 2.7 për qind, por mbeti në nivelin sezonal prej 2.4 për qind.

Vlerat përafërsisht korrespondojnë me pritjet e ekonomistëve. Në prag të publikimit ishte pritur një normë papunësie prej 2.6 deri 2.7 për qind për muajin dhjetor. Parashikimet për shifrat e rregulluara sezonale ishin 2.4 dhe 2.5 për qind.

Përveç kësaj, SECO llogariti 197,950 punëkërkues në muajin në fjalë, 7738 më shumë se në muajin paraprak. Megjithatë, krahasuar me vitin e kaluar numri ra me 6.6 për qind.

Zhvillimi i mirë në tregun e punës do të lehtësojë edhe financat federale. Viti financiar 2018 mbylli fondin e kompensimit të sigurimit të papunësisë me një suficit prej 1.11 miliardë franga zvicerane, kështu kreditë mund të përgjysmohen në 1.1 miliard.

---