BE-ja kundërshton rinegocimin e marrëveshjes për Brexit

Shefi negociator i Bashkimit Evropian për Brexit, Michel Barnier, ka thënë se kufiri irlandez është pjesë e marrëveshjes së Britanisë për largim nga Bashkimi Evropian dhe nuk do të rinegociohet.

Duke folur në Parlamentin Evropian, Barnier ka thënë se parandalimi i kufirit të ashpër është “zgjedhje e realizueshme”.

Ligjëvënësit britanikë kanë votuar më herët gjatë këtij muaji kundër marrëveshjes, për të cilën është pajtuar Mbretëria e Bashkuar dhe BE-ja përgjatë 18 muajve të negociatave, shkruan AlsatM, përcjell albinfo.ch.

Prandaj të martën ata kanë votuar që kryeministrja britanike, Theresa May, të kërkojë “marrëveshje alternative” për kufirin që ndan Irlandën Veriore dhe Republikën e Irlandës.

Mbretëria e Bashkuar pritet të largohet nga BE-ja më 29 mars të këtij viti.

Ndalesa në këtë pjesë është “siguri” për të ndaluar kthimin e mallrave dhe njerëzve nga njëri vend në tjetrin.

Në rast se kjo ndalesë do të vazhdojë të qëndrojë, ajo do të mbajë Mbretërinë e Bashkuar brenda unionit të doganave të BE-së, si dhe do të krijonte disa lehtësi në një treg të përbashkët.

Kjo ka qenë arsyeja kryesore e mosmarrëveshjeve në Parlamentin britanik, mirëpo Barnier ka thënë se një masë e tillë është e nevojshme që të përfshihet në marrëveshje, shkruan AlsatM, përcjell albinfo.ch.

Ndërkohë presidenti i Komisionit Evropian, Jean-Claude Juncker, ka thënë se beson në “përkushtimin personal” të kryeministres May për të parandaluar “kthimin mbrapa në të kaluarën e errët”.

Në referendumin e 23 qershorit 2016, 17.4 milionë persona, apo 51.9 për qind e votuesve kanë përkrahur largimin nga BE-ja, derisa 16.1 milionë të tjerë apo 48.1 për qind kanë votuar kundër Brexitit.