Makolli i nevrikosur me “Belle Air”

Ministri Ibrahim Makolli ka kërkuar që të paditen kompania "Belle Air" dhe ajo "Darwin" që vepron në Zvicër për “viktimizimin” e mërgimtarëve kosovarë

Ministri i Diasporës, Ibrahim Makolli i inkurajon mërgimtarët kosovarë që kanë rënë “viktimë” e avio-kompanisë “Belle Air” që ta padisin këtë kompani, e cila i lë për ditë të tëra qindra bashkatdhetarë në aeroportin “Adem Jashari” në Prishtinë.

“Qytetarët të cilët janë vonuar, u është anuluar fluturimi duhet t’i paditin kompanitë ku i kanë blerë biletat. Shumica e mërgimtarëve biletat i kanë marrë jashtë Kosovës, ku Kosova nuk ka mundësi të ngre padi”, ka thënë Makolli, raportin “Express”.

Ministri Makolli ka thënë se duhet të paditen kompania më e papërgjegjshme “Belle Air” dhe ajo kryesore “Darwin” që vepron në Zvicër.

“Operatori më i papërgjegjshëm deri tash për udhëtarët ështe tregu “Belle Air”, e cila operon në Kosovë e angazhuar nga ana e kompanisë “Darwin Airlines” me seli në Zvicër, e cila ka leje operimi në Kosovë”, ka deklaruar ai.

Reagimi i Makollit pason “viktimizimin” e qindra mërgimtarëve kosovarë të cilët kanë mbetur në aeroportin e Prishtinës duke pritur që të udhëtojnë për në diasporë. Ata kanë pritur me dit të tëra, pasi që kompania u kishte shitur më shumë bileta se sa që kishte vend në bord.

Sidoqoftë, Makolli thotë se mërgimtarët kosovarë duhet menjëherë t’i nisin veprimet ligjore ndaj kompanive të papërgjegjshme.

“Mërgimtarët tanë me rastin e kthimit të tyre nëpër vendet përkatëse duhet menjëherë të nisin procedurat ligjore ndaj kompanive ku i kanë blerë biletat”, ka shtuar ai.

Ministri kosovar ka treguar se ka thirr edhe vet në kompaninë ajrore për t’i pyetur për vonesat e udhëtarëve, por se asnjëherë s’ka marrë përgjigje. “Thjeshtë pas këtij rasti mendoj se fshihet diçka”, deklaron Makolli.

Një operator i suksesshëm, sipas tij, nuk ka nevojë që të mos jap as përgjigje për të gjithë ato probleme.

“Kam kërkuar prej zyrtarëve të Departamentit për Aviacionin Civili, por edhe prej Ministrisë së Infrastrukturës se çfarë është në pyetje sepse këta operatorë që veprojnë në Prishtinë marrin licencë prej këtij departamenti”, ka deklaruar Makolli.