Bankat, norma të larta të interesit

Ndërmarrjet dhe bizneset për të zgjeruar investimin e tyre detyrohen të marrin kredi në bankat komerciale me norma tejet të larta të interesit

Qeveria nuk ka përgjigje se pse bizneset e kanë të vështirësuar qasjen në financa, ndërsa përfaqësues të odave ekonomike dhe ekspertë të fushës kritikojnë mungesën e vizionit shtetëror.

Në Raportin e Progresit për Kosovën, të publikuar ditë më parë, një ndër pengesat kryesore për zhvillim të ndërmarrjeve konsiderohet edhe qasja në financa.

Përderisa komuniteti i biznesit dhe ekspertë të ekonomisë thonë se në këtë drejtim mungojnë projektet serioze dhe një strategji e mirëfilltë, në Ministrinë e Financave arsyetohen me disa sqarime, duke hezituar të japin shpjegime se përse deri më tani ka munguar krijimi i institucioneve, ku ndërmarrjeve dhe bizneseve do t’i jepej mundësia për qasje në financa me norma të ulëta të interesit, shkruan Kosova Sot.

Në mungesë të një banke zhvillimore, apo ndonjë banke të ngjashme, ndërmarrjet dhe bizneset për të zgjeruar investimin e tyre detyrohen të marrin kredi në bankat komerciale me norma tejet të larta të interesit, gjë që në shumë raste dalin të jenë të papërballueshme.

Sipas raportit të Bankës Qendrore të Kosovës, në vitin 2012 normat e interesit për kredi u karakterizuan me rënie, ndërkaq normat e interesit për depozita me rritje. Megjithatë, kamatat e kredive në Kosovë janë më të lartat në rajon.