30 për qind më pak azilkërkues në Zvicër

Një ndikim kanë pasur rrugët që kanë ndjekur kontrabandistët me refugjatë si dhe praktika e ndjekur nga vendet tjera evropiane në fushë të azilit

Në nëntë muajt e parë të këtij viti në Zvicër kanë kërkuar azil afër 16 mijë persona, që është për 30 për qind më pak se në periudhën e njëjtë të vitit të kaluar. Kjo rënie ndërkaq, nuk mund të shpjegohet vetëm me ashpërsimin e ligjit për azilin.

“Ky do të ishte një sqarim tepër i thjeshtësuar. Duhet marrë parasysh edhe shumë faktorë tjerë për te arritur në një konstatim të tillë” thotë Michael Glauser, zëdhënës i Zyrës Federale për Migracion (BFM).

Sipas tij, një ndikim në zvogëlimin e numrit të azilkërkuesve kanë pasur edhe rrugët që kanë ndjekur kontrabandistët me refugjatë si dhe praktika e ndjekur nga vendet tjera evropiane në fushë të azilit. Por, megjithatë, edhe zëdhënësi pranon se edhe ashpërsimi masave të shtetit zviceran në fushë të azilit ka pasur një ndikim, shkruan srf.ch. Në veçanti ka ndikuar shkurtimi i procedurave te azilkërkuesit nga Ballkani, ata nga Tunizia dhe nga Nigeria.

Edhe profesori i drejtësisë, Peter Uebersax, ekspert i të drejtës së migracionit në Universitetin e Bazelit mendon se ashpërsimi i të drejtës ë azilit nuk ka ndikuar drejtpërdrejtë në zvogëlimin e numrit të azilkërkuesve në Zvicër. Sipas tij, faktorë shumë më të rëndësishëm janë zhvillimet në botë si luftërat, katastrofat ose ndëriimet e regjimeve.

Bazuar në të gjitha këto, numri i azilkërkuesve në Zvicër, i cili aktualisht po trego trend zvogëlimi, mund të ndryshojë, në varësi nga zhvillimet në botë. “Në shtetet rreth Zvicrës, numri i azilkërkuesve është rritur në vazhdimësi. Për këtë arsye ne duhet të presim po ashtu rritje të numrit të tyre”, ka thënë Glauser.