Raporti i Lumturisë: Zvicra e gjashta, Kosova e 46-ta

Në top dhjetë vendet e para të lumturisë janë: Danimarka, Norvegjia, Islanda, Holanda, Zvicra, Suedia, Zelanda e Re, Kanadaja dhe Austria

Finlanda është zgjedhur sërish vendi më i lumtur në botë, duke ruajtur kështu vendin e parë.

Kjo në bazë të Raportit më të ri për Lumturinë në Botë, të lëshuar nga Rrjeti për Zgjidhje të Qëndrueshme Zhvillimore në kuadër të OKB-së.

Në top dhjetë vendet e para të lumturisë janë: Danimarka, Norvegjia, Islanda, Holanda, Zvicra, Suedia, Zelanda e Re, Kanadaja dhe Austria. SHBA-ja u rendit në vendin e 19-të, duke rënë një vend nga viti i kaluar.

Kosova renditet si vendi i 46 më i lumtur në botë. Raporti i lumturisë botërore është një studim historik i gjendjes së lumturisë globale që i rendit 156 vende, nisur nga fakti se sa të lumtur janë qytetarët e tyre, transmeton “REL”.

Raporti i sivjetshëm i lumturisë fokusohet në lumturinë dhe komunitetin: se si lumturia ka evoluar gjatë dhjetëra viteve të fundit, me fokus në teknologjitë, normat shoqërore, konfliktet dhe politikat qeveritare që i kanë nxitur këto ndryshime, përcjell albinfo.ch.

Kosova në këtë raport renditet si vendi i 46 ndërkaq vendet tjera të rajonit kanë këtë renditje: Serbia në vendin e 70-të, Mali i Zi 73, Kroacia 75, Bosnje dhe Hercegovina 78, Maqedonia 84 përderisa Shqipëria në vendin e 107-të.

Sondazhet janë bërë për periudhën ndërmjet viteve 2016-2018.

Ndërkaq në fund të listës së vendeve më të lumtura gjenden: Afganistani në vendin e 154, Republika e Afrikës Qendrore në vendin e 155 dhe Sudani Jugor renditet në vendin e 156-të .

Dita Ndërkombëtare e Lumturisë shënohet më 20 mars.

---