Kërkon dëmshpërblim, viktima dënohet me 120 mijë franga

Familja e vajzës kishte paditur prodhuesin e medikamenteve "Yasmin", kompaninë gjermane “Bayer”, duke kërkuar dëmshpërblim prej 5.7 milionë frangash

Celine, ka qenë një vajzë e hareshme 16 vjeçe, kur, gjashtë vite më parë mjeku i kishte përshkruar tabletat “Yasmin” kundër mbetjes shtatzënë. Nga k medikament ajo kishte pësuar shumë rëndë, një emboli të mushkërive e cila i ka shkaktuar pasoja për tërë jetën. Familja e saj ka paditur prodhuesin e medikamenteve të përmendura, kompaninë gjermane “Bayer”, duke kërkuar dëmshpërblim prej 5.7 milionë frangash, sa do të jenë të nevojshme sipas saj për tu përkujdesur për vajzën e mbetur plotësisht e paaftë, deri në fund të jetës.

Por, Gjykata e Qarkut në Cyrih, në një vendim të saj. përveç që e ka hedhur poshtë akuzën dhe kërkesën e familjes, e ka dënuar atë duke e dënuar me gjobë prej 120 mijë frangash, të cilat duhet t`ia paguajë kompanisë së përmendur, farmaceutike, në emrin e shpenzimeve procedurale!

Vajza që tash është  22 vjeçe, kështu mbetet pa dëmshpërblim, ndërkohë që Bayer deri më tash për raste të ngjashme lidhur me medikamentin Yasmin ka paguar deri një miliard e gjysmë dollarë në emër të dëmshpërblimit. Kjo kompani i arsyeton këto diferenca në trajtim me sistemet e ndryshme juridike që janë në fuqi në Zvicër dhe në SHBA, njofton emisioni “Rundschau” i srf1.

Sipas gjykatës, familja nuk ka mundur të dëshmojë se sëmundja e rëndë e vajzës së tyre ka ardhur si pasojë e përdorimit të ilaçit të përmendur.

Familja megjithatë ka vendosur që për rastin e saj të ankohet edhe në Gjykatën e lartë të Cyrihut.