Tragjedi në minierën e Pogradecit

Pesë të rinjtë, të gjithë nga e njëjta familje, kishin hyrë në minierën e Dardhas për të mbledhur skrap (hekur), por nga lëshimi i gazrave kishin mbetur të vdekur brenda galerive

Pesë djem të rinj, nga fshati Dardhë i Komunës së Pogradecit kanë humbur jetën tragjikisht në minierën e këtij fshati. Të rinjtë, të gjithë nga e njëjta familje, kishin hyrë në minierën për të mbledhur hekur për skrap, por nga lëshimi i gazrave kishin mbetur brenda.

Viktimat janë tre vëllezërit Edison, Ledjon dhe Nertil Hamolli, përkatësisht 23, 24 dhe 25 vjeç. Gjithashtu në këtë tragjedi kanë humbur jetën edhe dy vëllezërit Sazan dhe Arjan Hamolli kushërinj me tre vëllezërit e parët.

Sipas medieve shqiptare, të rinjtë ishin futur në minierë për të nxjerrë skrap. Ndërsa dyshohet se shkak i vdekjes së tyre është bërë një gjenerator me anë të të cilit vihej në punë një pompë që shërbente për nxjerrjen e ujit jashtë minierës. Tymi i gjeneratorit i ka asfiksuar të rinjtë.

Policia dhe shtabi i emergjencave ka mbërritur në vendngjarje. Ndërsa grupi i kërkim-shpëtimit tashmë ka nxjerr viktimat e para, vëllezërit Edisonit dhe Nertil Hamollit, 23 dhe 25 vjeç.

Galeritë e minierës janë të gjata 300 metrash, prandaj siç raportohet, nxjerrja e trupave është bërë e vështirë jo për shkak të thellësisë, por për shkak të pranisë së madhe të gazit.

Ndryshe, nxjerrja e hekurit për skrap, siç raporton BW, ka mbetur si e vetmja alternativë për të siguruar jetesën e disa prej banorëve të këtyre fshatrave. Galeritë e minierës së Dardhas në Pogradec, për pak sa nuk i kushtuan me jetë edhe një 24 vjeçari tjetër.

Ardian Hamolli mbeti i bllokuar për afro 12 orë në minierën për shkak të rrëshqitjeve të gurëve në zonën ku ai gërmonte. Moskthimi i tij në shtëpi ka alarmuar familjarët të cilët lajmëruan policinë. Kjo e fundit së bashku me forcat e kërkim-shpëtimit nisën operacionin për nxjerrjen e të riut nga miniera.

Ministria e Energjetikës dhe Industrisë ka reaguar mbi ngjarjen e rëndë në Dardhas. Në një njoftim për shtyp nga ky dikaster bëhet e ditur se miniera e Pogradecit është jashtë funksionit prej 20 vitesh.

Komuna e Dardhas ka marrë përsipër shpenzimet për varrimit, ndërkaq u ka bërë thirrje autoriteteve që të mbyllen minierat. “Mbyllni minierat përndryshe tragjeditë do të përsëriten”, thuhet në kërkesën e tyre.