Parlamenti, masa mbrojtëse shtesë për viktimat e pedofilisë

Pedofilët që tashmë kanë marrë dënimin, edhe së paku dhjetë vite pas vuajtjes së tij nuk do të kenë të drejtë të punojnë me fëmijë

Dhoma Nacionale e Parlamentit të Zvicrës ka miratuar ligjin i cili mundëson mbrojtje më të mirë ë fëmijëve nga pedofilët. Ligji u ofron gjykatave më shumë hapësirë të lirë për këtë qëllim, në krahasim me iniciativën popullore për mbrojtje nga pedofilia.

Me këtë veprim, dhoma në fjalë ka dhënë në njëfarë mënyre kundërpropozimin e saj indirekt ndaj iniciativës për pedofilinë.

Sipas ligjit të miratuar sot, pedofilët që tashmë kanë marrë dënimin, edhe së paku dhjetë vite pas vuajtjes së tij nuk do të kenë të drejtë të punojnë me fëmijë. Veç kësaj ndalese për personat në fjalë do të ketë edhe ndalesa për kontakte dhe për frekuentim në rajone të caktuara. Ndërsa nga ana tjetër, iniciativa kërkonte që ndalesa e ushtrimit të profesionit që ka të bëjë me fëmijë për një pedofil të dënuar të vlente gjatë gjithë jetës.

Ekspertët e lëndës mendojnë se ndalesa e përjetshme është problematike nga ana e të drejtës. Ndërsa propozimi i qeverisë ka qenë që ndalimi i profesionit për pedofilët të shtrihet edhe në punët jashtë profesionit të tyre primar. Po ashtu ekzekutivi kishte propozuar dy forma të ashpra të ndalimit të ushtrimit të profesionit për personat që kanë kryer delikte ndaj të miturve  ose personave të lëndueshëm.

Për iniciativën e përmendur do të votohet vitin e ardhshëm ndërsa ligji i miratuar nga parlamenti do ë hyjë në fuqi më shpejtë.