S’ka rritje pagash më shumë se 14 për qind

Sipas ekspertëve të Fondit Monetar Ndërkombëtar, me buxhetin që e ka Kosova, nuk mund të ketë rritje me të madhe se 14 për qind

Kryeministri i Kosovës, Hashim Thaçi ka premtuar rritje të pagave për arsimtarët dhe sektorin publik deri 100 për qind brenda katër viteve të ardhshme, por një gjë e tillë konsiderohet e pamundur nga ekspertët e Fondit Monetar Ndërkombëtar (FMN).

Sipas ekspertëve të ekonomisë, me buxhetin që e ka Kosova, nuk mund të ketë rritje me të madhe se 14 për qind.

Besim Beqaj është ministri i Financave në Qeverinë e Kosovës. Por edhe Beqaj, siç raporton KLive, nuk ka qenë në gjendje të deklarojë se sa do të jenë rritjet e pagave për shërbyesit në institucionet e Kosovës si, arsim, shëndetësi, polici, FSK, etj.

“Ne kemi siguruar masë monetare që do të mundësojë rritjen e pagave. Sigurisht se ky vendim do të jetë vendim meritor për të gjithë njerëzit në Kosovë të cilët kanë të bëjnë më institucionet e Kosovës. Ky vendim do të jetë i qeverisë dhe do t’u njoftojmë me kohë kur dhe sa do të rriten”, k deklaruar Beqaj.

Stabiliteti buxhetor, siç ka thënë ai, i mundëson Qeverisë së Kosovës që të ketë rritje meritore për vitin 2014 dhe të vazhdohet edhe më tutje.

Në projektbuxhetin për vitin 2014 janë paraparë, 484 milionë euro në llogarinë e pagave, që janë 45 milionë më shumë se sa vitin e kaluar që ishin 439 milionë për paga. Në  publikimin e FMN-së, ndërkaq thuhet rritja e pagave nuk do të kaloj 14 përqindëshin.

Sipas FMN-së, draftbuxheti përmban shpenzimet aktuale të 1.062 milionë euro (19.3 për qind të GDP-së), e që brenda kësaj mbulese, pagat e sektorit publik janë rritur nga 8.3 për qind në 8.9 për qind.

Kryeministri Hashim Thaçi gjatë fushatës zgjedhore ka deklaruar se nga 1 janari do të ketë rritje të pagave për arsimtarët dhe për të gjithë punëtorët e sektorit publik. Thaçi ka thënë se ngritjet do të shkojnë 100 për qind brenda katër viteve, që i bije nga 25 për qind për çdo vit.