Projekti gjigant për veturat elektrike nga Franca dhe Gjermania

Keystone

Mes vlerës pesë deri në gjashtë miliardë euro do të investohen në total në një projekt evropian për prodhimin e baterive të automjeteve, i emërtuar “Airbus i baterive”, njoftuan ministrat francezë dhe gjermanë të Ekonomisë, Bruno Le Maire dhe Peter Altmaier.

“Vetëm për këtë projekt do të investohen 5 deri në 6 miliardë euro për ndërtimin e linjave të para të prodhimit”, deklaroi Le Maire gjatë një konference shtypi me homologun gjerman dhe komisionerin evropian për Energjinë, Maros Sefkoviq.

“Shuma e përgjithshme do të përbëhet nga 1,2 miliardë euro nga subvencionet publike dhe rreth 4 miliardë euro nga fondet private”, shtoi ai, transmeton “ATSH”.

Sipas ministrave, ky projekt i ndërmarrë nga Franca dhe Gjermania, synon të krijojë 200 vende të reja punë në muajt e ardhshëm dhe më pas dy fabrika prodhimi në Francë dhe Gjermani me parashikimin për të krijuar 1 500 vende pune në secilin shtet, përcjell albinfo.ch.