Pensionet të bëhen temë e bisedimeve me Serbinë

Shaban Kajtazi, kryetar i Lidhjes së Pensionistëve të Kosovës, ka thënë se pensionistët e të gjitha kategorive janë në gjendje të vështirë ekonomike dhe sociale

Në bisedimet në mes të Kosovës dhe Serbisë do të duhej të përfshihej edhe çështja e kthimit të pensioneve që pensionistëve kosovarë ua ka marrë Serbia. Kjo kërkesë rezulton veç tjerash, nga takimi që kryetari i Lidhjes së Pensionistëve të Kosovës ka pasur me kryetarin e AAK-së, Ramush Haradinaj.

Pensionistët e Kosovës kërkojnë që pensionet që ua ka borxh Serbia pensionistëve të Kosovës, të kthehen sa më parë. Këtë kërkesë e ka përcjellë kryetari i Lidhjes së Pensionistëve të Kosovës, Shaban Kajtazi, në takimin me kryetarin e AAK-së, Ramush Haradinaj. Lideri i AAK-së ka thënë se çështja e kthimit të fondit pensional duhet të jetë temë e bisedimeve me Serbinë, transmeton KTV. Ai u ka premtuar atyre se kërkesat e tyre do të përkrahen nga deputetët e AAK-së në Kuvendin e Kosovës.

Shaban Kajtazi, kryetar i Lidhjes së Pensionistëve të Kosovës, ka thënë se pensionistët e të gjitha kategorive janë në gjendje të vështirë ekonomike dhe sociale.

Pensionistët e Kosovës shpesh takojnë liderë të ndryshëm të partive politike, gjithmonë duke kërkuar që të drejtat e tyre të realizohen, thuhet në njoftimin e KTV-së.