Dhjetë raste me “grip të derrit”

Në Qendrën Klinike Universitare të Kosovës janë vërtetuar dhjetë raste me grip të derrit, ndërsa një paciente është në gjendje të rëndë

Në Qendrën Klinike Universitare të Kosovës (QKUK) në Prishtinë janë diagnostikuar 10 raste me virusin H1N1 që në opinion njihet si “Gripi i Derrit”. Këto raste i konfirmoi të hënën drejtori i Klinikës Infektive, Shemsedin Dreshaj në një konferencë për media.

Ai tha se me datën 27 janar, kanë shkuar mostrat e para për testim në laborator për raste të dyshuara, por ato kanë rezultuar negative, ndërkohë rasti i parë është konfirmuar ditën e premte.

“Rasti i parë i verifikuar në laborator me prani të virusit H1N1, është paraqitur të premten, deri tani kemi 10 raste të konfirmuara në laborator, përderisa 5 të tjera janë raste të gripit sezonal”, ka thënë Dreshaj, sipas të cilit, një pacientë është në gjendje të rëndë shëndetësore.

“Një paciente e lindur më 1957 nga Dragashi është në gjendje të rëndë shëndetësore dhe është e intubuar, përderisa për 3 raste të tjera si të dyshuara me prani të virusit H1N1 janë duke u pritur rezultatet nga laboratori”, citon KTV doktorin e Infektivës.

Dreshaj ka thënë se janë të furnizuar mirë me barna dhe terapinë tjetër përcjellëse që nevojitet për trajtim të pacientëve, përderisa për këtë ekziston edhe strategjia nacionale, e cila është në përputhje me strategjinë botërore për luftim të sëmundjes së tillë.

Ai i rekomandoi të gjithë qytetarëve që të kenë kujdes, mos të grumbullohen në grupe të mëdha dhe ne ambiente të mbyllura, e po ashtu të kenë kujdes kur teshtijnë dhe te lajmërohen me kohë te mjeku.

Duke folur për trajtimin e pacientëve, Dreshaj është shprehur se Klinika Infektive ka staf të profesional dhe hapësira të mjaftueshëm për trajtim të rasteve të tilla. Ndryshe, Gripi i Derrit nuk dallon shumë nga ai sezonal, edhe pse pasojat e tij janë dukshëm më të rënda.