Kompanitë franceze të interesuara për Kosovën

Energjia e ripërtëritshme, ujërat, mineralet dhe disa fusha të tjera, duket se janë piketuar nga afaristët francez për të investuar në Kosovë

Një delegacion nga komuniteti i biznesit francez po qëndron në Kosovë për të parë nga afër se çka ofron Kosova për investitorët francez. Energjia e ripërtëritshme, ujërat, mineralet dhe disa fusha të tjera, duket se janë piketuar nga afaristët francez për të investuar në Kosovë.  

Delegacioni i Kosovës drejtohet nga Julien Roche, president i Odës së Tregtisë dhe Industrisë Francë-Shqipëri, Claude Scheuer, këshilltar në kompaninë franceze Degremont, të cilët u shoqëruan nga Ambasadorja e Francës në Kosovë, Maryse Daviet.

Ky delegacion sot zhvilloi një takim me ministrin e Zhvillimit Ekonomik, Fadil Ismajli. Ky i fundit e njoftoi delegacionin francez me zhvillimet ekonomike në vend, kornizën institucionale dhe ligjore, mjedisin biznesor që ofron vendi për investitorët e huaj si dhe projektet që janë në zhvillim e sipër.

Më tej u diskutuan për bashkëpunimin e ndërsjellë në fushën e energjisë, energjisë së ripërtëritshme, mineralet e fusha tjera me interes të përbashkët.

Me këtë rast një vend i veçantë iu kushtua mundësisë së prurjes së investitorëve francezë që të diskutohen projekte konkrete në fushat që mbulon MZHE, ndërsa u shtrua nevoja për asistencë teknike dhe avancimi i bashkëpunimit me odat ekonomike në Kosovë.

Ndryshe, kompania franceze Degremont është e specializuar në ofrimin e zgjidhjeve që përmes projekteve përkatëse të trajtojë ujërat dhe shërbime të tjera për autoritetet lokale dhe industrive të ndryshme.