Haradinaj, Vuçiq dhe Gjuriq reagojnë për aksionin në veri

Ramush Haradinaj ka ftuar serbët e veriut ta ruajnë qetësinë dhe ta respektojnë ligjin

Kryeministri i Kosovës, Ramush Haradinaj pas aksionit të gjerë të policisë në veri të Mitrovicës, ka deklaruar se bëhet fjalë për zbatimin e ligjit dhe asgjë tjetër.

Haradinaj ka ftuar serbët e veriut ta ruajnë qetësinë dhe ta respektojnë ligjin, përcjell albinfo.ch.

“Me urdhër të Prokurorit, në gjithë Kosovën aktualisht është duke ndodhur një operacion policorë, i drejtuar ndaj individëve të përfshirë në kontrabandë, krim të organizuar dhe vepra të tjera kriminale. Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Operacioni u zhvillua me sukses edhe në Komunat Veriore të Kosovës. Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin!”, ka shkruar Haradinaj në Facebook.

Presidenti serb Aleksandar Vuçiq ka nisur siç raportohet aktivitetet intensive diplomatike pas aksionit të sotëm të policisë së Kosovës në veri.

Kështu i kanë thënë Tanjugut nga kabineti i tij, transmeton Klan Kosova.

Raportohet se presidenti i Serbisë i kërkoi “qendrave politike perëndimore që të ndalin Prishtinën dhe e bëjnë të qartë se Serbia nuk do të lejojë pastrimin etnik në Kosovë.

Drejtori i Zyrës për Kosovën në Qeverinë e Serbisë, Marko Gjuriq i tha RTS-së se në emër të presidentit të Serbisë, Aleksandar Vuçiq,i ka informuar përfaqësuesit ndërkombëtar se nëse nuk e ndalin aksionin e Prishtinës, se kundëraksioni i Serbisë do të ndërmerret brenda ditës së sotshme.

Siç citohet nga mediat serbe, ai ka thënë se “forcat ROSU në Zubin Potok po sulmojnë popullsinë e paarmatosur serbe”, transmeton Koha.net.

---