Shefi për integrim nga St. Galleni viziton Bujanocin dhe Kosovën

Felix Baumgartner, drejtor i Zyrës për Integrim në kantonin St. Gallen dhe në qytetin Wil dëshiron t`i njohë vendbanimet shqiptare në regjion

Në fillim të muajit prill, drejtori i zyrës për Integrim të kantonit St. Gallen dhe qytetit Wil, Felix Baumgartner viziton qytetin e Bujanocit dhe disa fshatra në këtë komunë.

Baumgartner gjatë kësaj vizite do të shoqërohet nga regjisori, koordinator i Qendrës Kinematografike dhe Kulturore komunale, Valton Jakupi, i cili njëherësh është edhe bashkëprojektues i projekteve kulturore për integrim në këtë kanton.

Qëllimi i kësaj vizite është njohja nga afër e vendbanimeve shqiptare, pasi që një numër i madh i qytetarëve të atjeshëm jetojnë edhe në kantonin St. Gallen, thuhet në një njoftim të dërguar nga V. Jakupi, anëtar i Grupit Shqiptar për integrim në Wil dhe St. Gallen.

Në kuadër të kësaj vizite Felix Baumgartner dhe Valton Jakupi do të kenë takime edhe me kryetarin e Komunës së Bujanocit, Nagip Arifin, po ashtu me deputetin në Parlamentin e Republikës së Serbisë, Shaip Kamberin, si dhe kryetarin e Këshillit Nacional Shqiptar, Galip Beqirin.

Mysafiri nga Zvicra do ta vizitojë edhe shkollën fillore “Muharrem Kadriu” në Tërnoc dhe gjimnazin e Preshevës.

Vizita e zyrtarëve kantonalë për Integrim dhe Kulturë do të vazhdojë edhe në disa qytete të Kosovës, Maqedonisë dhe Malit të Zi, ku do të zhvillohen takime me përfaqësues politik, përfaqësues për integrim dhe kulture si dhe me disa parti politike.

Felix Baumgartner është njëherësh edhe producenti kryesor i filmit dokumentar me titull “Cili je Ti”, në regji të Valton Jakupit. Ky film bën fjalë mbi shqiptarët në Zvicër dhe premiera e tij do të jepet në muajin maj. Ai është realizuar me ndihmën e autoriteteve kantonale të St. Gallenit dhe te qytetit Wil. 

Filmi është i realizuar ne gjuhën gjermane dhe është i titruar në gjuhën shqipe. Kësaj vizite do t’i bashkëngjitet  edhe aktori Blerim Abazi, njëherësh aktor në filmin e përmendur.

Felix Baumgartner dhe Valton Jakupi, kanë filluar disa pilot projekte kantonale për shqiptarët në këtë kanton, ku vlen te theksohet aftësia e mësimit të gjuhës shqipe për fëmijët parashkollorë, takimi mes shqiptarëve dhe organeve kantonale që mbahet një herë në vit dhe shumë projekte të tjera për shqiptarët në këtë kanton, thuhet në fund të njoftimit të dërguar nga Valton Jakupi.