Kuqezinjtë përfundojnë përgatitjet në Frankfurt

 Është mbyllur në Frankfurt, faza e përgatitjeve të skuadrës kombëtare shqiptare përpara nisjes për në Islandë. Sipas programit, kuqezinjtë nën drejtimin e trajnerit Edi Reja dhe stafit të tij, janë stërvitur për mbi 90 minuta në fushën sportive të FC Oberstedten, shkruan faqja zyrtare e FSHF-së.  

Variante taktike të aplikuara drejtpërdrejtë në fushë, lojë me dy porta dhe në fund streçing, ishin disa nga detajet e stërvitjes së sotme. Pas përfundimit të stërvitjes, trajneri Reja, falënderoi përfaqësuesit dhe punëtoret e fushës sportive të Oberstedten për gatishmërinë dhe përkushtimin e treguar, gjatë këtyre ditëve në shërbim të skuadrës kombëtare. 

 Kombëtarja shqiptare e futbollit, stafi dhe drejtuesit e saj, bënë një foto të përbashkët me ekipe moshash të FC Oberstedten, përcjell albinfo.ch.  

Në konferencën e fundit për shtyp zhvilluar në Gjermani folën portieri Etrit Berisha dhe mesfushori Ergys Kaçe, duke shprehur optimizmin për ndeshjen me Islandën dhe më pas me Moldavinë në Elbasan.