Një në tri makina gjermane bart para “të papastra” nga Zvicra

Bëhet fjalë për shtetas gjermanë që i kanë ikur pagesës së tatimit në vendin e tyre duke i deponuar paratë në bankat zvicerane

mAferat që kanë shpërthyer kohëve të fundit lidhur me deponimin e parave të “papastra” të kursyesve gjermanë në bankat e Zvicrës kanë alarmuar deponuesit në fjalë për të tërhequr ato para. Bëhet fjalë për shtetas gjermanë që i kanë ikur pagesës së tatimit në vendin e tyre duke i vendosur paratë në Zvicër.

Si pasojë e frikës se mund të zbulohen, gjithnjë më shumë persona të tillë po i marrin paratë dhe po përpiqen t`i kthejnë në Gjermani “në të zezë”. Doganierët gjermanë thonë madje se kaq e përhapur është kjo dukuri sa që çdo e treta makinë gjermane që hyn në Gjermani nga Zvicra, sjell para. Kështu ka deklaruar një zëdhënës i doganës gjermane në Ulm për revistën ekonomike gjermane “Wirtschaftswoche”. Kjo qendër doganore është përgjegjëse për kufijtë në trekëndëshin Gjermani-Austri-Zvicër.

Sipas deklarimit të tij shumat që sillen në Gjermani vijë duke u rritur kështu, gjithnjë e më shumë kapen shuma gjashtëshifrore (mbi 100 mijë euro). Ndërkohë, shuma maksimale e lejuar për të kaluar kufirin pa u deklaruar në gjithë BE-në është 10.000 euro.

Shumë banka zvicerane u kanë vënë ultimatum klientëve të tyre që deri në fund të vitit të deklarojnë paratë e pa taksuara. Kjo i ka vënë nën presion shumë gjermanë me para të papastra. Gjatë vitit 2013 dogana gjermane pati kapur shumën rekorde prej 573 milionë eurosh të papastra, në tentim për t`i kthyer në Gjermani.