U protestua edhe kundër abuzimit me pronën shoqërore në Kosovë

Aktiviteti qendror është mbajtur sot në Cyrih, ku, në sheshin, Sechseläuteplatz, para rreth 14 mijë vetave ka folur kryetari i SP/PS të Zvicrës, Christian Levrat.

Festa e Një majit, si kudo në perëndim, edhe në Zvicër shënohet me manifestime masive që pos karakterit festiv kanë edhe karakter të protestës kundër shkeljes së të drejtave të punëtorëve.

Këtë vit 1 Maji ka qëlluar pak ditë para referendumit për pagën minimale që mabhet më 18 maj dhe kjo ka kushtëzuar në një masë edhe përmbajtjen dhe pamjen e shumicës së rreth 50 tubimeve të tilla.

Përveç manifestimeve brenda rregullave, organizohen edhe demonstrata të elementit ekstrem të majtë, që shpesh përfundojnë me vandalizëm e dhunë.

Aktiviteti qendror kushtuar ditës së punëtorëve është mbajtur sot në Cyrih. Në sheshin e madh të përuruar një javë më parë, Sechseläuteplatz, para rreth 14 mijë vetave ka folur kryetari i Partisë Socialdemokrate të Zvicrës, Christian Levrat.

Po ashtu edhe dy ministrat federalë nga kjo parti: Alain Berset dhe SImonetta Sommaruga kanë qenë pjesë e aktiviteteve me këtë rast. Berset ishte në tubimin që u mbajt në sheshin Ratshausplatz të Thunit ndërsa ministrja Sommauga, në fabrikën e veglave të punës Fraisa në Bellach të Solothurnit.

Vetëm shefi i Federatës së Sindikatave të Zvicrës,, deputeti i SP/PS, Paul Steiner do  t`u mungojë kësaj here tubimeve të 1 majit në Zvicër. Ai është ftuar të mbajë një fjalë në një tubim të sindikatave të Gjermanisë, në Nürnberg.

Ishte pritur që në Cyrih të vinte edhe kryebashkiakja e ishullit  italian Lampeduza, Giuseppina Nicolini, e njohur si luftëtare për të drejtat e njeriut e në veçanti të refugjatëve. Por ajo ka njoftuar tri ditë më parë se nuk do të mund të jetë e pranishme.

Krahas aktivteteve të rregullta e zyrtare në Cyrih mbahet sot edhe një kundërdemonstratë, e “aktivistëve të majtë”. Në vitet e kaluara manifestimet e këtij grupimi shpesh kanë përfunduuar me demolime dhe vandalizma. Për këtë arsye shumë shitore kanë “barrikaduar” vitrinat e tyre, nga frika se mund t`u shkatërrohen.

Ndërkohë, në kuadrin e një manifestimi publik  të mbajtur në qytetin Schaffhausen, kanë marrë pjesë aktive edhe përfaqësues të shqiptarëve të këtushëm. Me pankarta kundër “shpronësimit dhe abuzimit me të mirat publike dhe shoqërore” aty është paraqitur edhe deputeti i Parlamentit të Kosovës nga Lëvizja Vetëvendosje, Faton Topalli bashkë me sekretarin për migracion të sindikatës Unia Osman Osmanin dhe me aktivistë të tjerë shqiptarë e zviceranë.