7 të lënduar gjatë fikjes së zjarrit në Zug

Dy prej tyre, për shkak t ëhelmimit me gazrat e lëshuar nga zjarri janë dërguar në spital. Ndërsa pesë të tjerët janë trajtuar në vendin e ngjarjes

Një zjarr i madh që kishte shpërthyer mbrëmjen e të enjtes në kulmin e Bankës Kantonale të Zug-ut ka shkaktuar lëndimin e një numri të zjarrfikësve që kishin shkruar në numër të madh për ta shuar zjarrin.

Godina e bankës në fjalë ka qenë duke u rinovuar ndërsa zjarri kishte shpërthyer pak pas mbarimit të punimeve për ditën e enjte, rreth orës 19.15. Kështu, as në kulm dhe as në pjesën tjetër të ndërtesës nuk kishte njerëz në kohën e shpërthimit të zjarrit, ka njoftuar policia e Zug-ut. Sipas saj, zjarri është shkaktuar pasi që fillimisht  kishte marrë flakë një fuçi me bitum.

Rreth mesnatës zjarri tashmë ishte nën kontroll. Por, shtatë persona që kanë marrë pjesë në shuarjen e zjarrit është dashur t`i nënshtrohen trajtimit mjekësor, shkrun nzz.ch. Dy prej tyre, për shkak të stërlodhjes gjegjësisht helmimit me gazrat e lëshuar nga zjarri janë dërguar në spital. Ndërsa pesë të tjerët janë trajtuar nga ekipet e ndihmës së parë në vendin e ngjarjes.

Në aksionin e shuarjes së zjarrit kanë marrë pjesë rreth 250 zjarrëfikës nga Zug-u dhe regjioni.

Policia ende nuk ka të dhëna lidhur me shkaktarin e mundshëm të zjarrit.