Lajme

Kosova zhytet në krizë energjetike

Kosova ka hyrë në një krizë energjetike si pasojë e zvogëlimi të prodhimit në termoelektranat e saj, pas një shpërthimi që javë më parë ndodhi në Departamentin e Elektrolizës të Kompanisë Elektroenergjetike të Kosovës (KEK). Si pasojë e kësaj krize KEK-u ka kërkuar shtrenjtimin e energjisë elektrike, në mënyrë që të ketë fonde për të blerë energji, sidomos gjatë muajve të dimrit.

E enjte, 14 Gusht 2014 - 15:07 albinfo.ch

Pas aksidentit të termocentralit “Kosova A” prodhimi i energjisë ka renë dukshëm, ndërsa ka shtim të importit, tha zëdhënësi i KEDS-it, Guri Shkodra. Ai ka theksuar se edhe pse KEDS-i nuk është i obliguar të importojë energji elektrike, ai ka filluar ta bëjë këtë që nga data 6 qershor e këtij viti, nga dita kur ka ndodhur shpërthimi në “Kosovën A”.

“Shpesh importi nuk mbulon kërkesën për konsum të qytetarëve të Kosovës, sidomos ditëve të fundit kur konsumi ngritët dukshëm, për shkak te temperaturave mjaft të larta edhe për shkak të nevojës se qytetarëve që të ftohen më pajisje të ndryshme. Ne jemi duke importuar energji me vlerë prej diku 250 megavatë, deri sa prodhimi vendor është vetëm 450 mgevatë”, ka thënë Shkodra.

Ai ka shtuar se KEDS-i është duke e bërë të pamundurën që qytetaret e vendit që mos të kenë mungesë të energjisë, por ai nuk mundur të premtojë nëse gjatë dimrit Kosova nuk do të përballet me mungesë të rrymës elektrike.

“KEDS ka ofruar të gjitha informatat dhe ka qenë partner i të gjitha institucioneve tjera në sektorin e energjisë, në mënyrë që të gjinden zgjidhje që kjo krizë energjetike të tejkalohet dhe të ketë ndikimin me të ulët për të gjithë qytetaret e vendit”, ka thënë më tej Shkodra.

Pas shtrenjtimit të energjisë elektrike në muajin korrik, ngritje të serishme çmimit mund të ketë edhe muajt e ardhshëm, pasi një kërkesë të tillë operatorët energjetikë që veprojnë në Kosovë, tashmë kanë dorëzuar te Zyra e Rregullatorit të Energjisë (ZRRE).

Por, përfaqësues të shoqërisë civile, të punëtorëve dhe qytetarët, kanë kërkuar që autoritetet kompetente të mos e aprovojnë këtë kërkesë, pasi ngritja e çmimit rëndon jetën e qytetarëve dhe bizneset.

Shprehje të pakënaqësisë në rast të ngritjes së çmimit, tashmë ka paralajmëruar Bashkimi i Sindikatave të Pavarura të Kosovës (BSPK)

Kryetari i kësaj sindikate, Haxhi Arifaj, ka deklaruar ditë më pare se ka kjo sindikatë ka kërkuar nga ZRRE-ja që të rishqyrtohet vendimi për ngritjen e parë që është bërë muajin e kaluar, e jo tashmë të realizohet edhe ngritja e dytë.