Luftë kundër migrimit ilegal

Kontrabandimi me emigrantë është dukuri shqetësuese edhe për Kosovën, ku ndër ta shumë gra dhe fëmijë kanë rënë pre e trafikimit, tha Izmi Zeka, zëvendësministër i Brendshëm në Kosovë

Shumica e vendeve të botës, pa përjashtuar Kosovën dhe vendet tjera të Ballkanit, janë të përfshira në kontranadimin me emigrantë, zeje kjo që po u sjell trafikantëve miliarda euro në vit. Kjo dukuri në Kosovë po përcillet edhe me konsekuenca integruese, prandaj kërkohet që të luftohet.

Kështu u tha të mërkurën në një konferencë shkencore rajonale me temën: “kontrabandimi me migrant – (Kosova dhe refleksionet e saj)” organizuar nga Kolegji Evropian i Kosovës në Prishtinë. Në konferencë kanë marrë pjesë përfaqësues nga Kosova, Shqipëria, Maqedonia dhe Mali i z.

“Kontrabandimi me emigrantë është dukuri shqetësuese edhe për Kosovën, ku ndër ta shumë gra dhe fëmijë kanë rënë pre e trafikimit të kontrabanduesve dhe janë shfrytëzuar për përfitime materiale përmes rrugëve të ndryshme”, deklaroi Izmi Zeka,  zëvendësministri në detyrë i Punëve të Brendshëm në Kosovë.

Ai tha se shpeshherë organizohen takime të tilla politike, por aspektet shkencore janë shumë më relevante dhe japin rrugë për një çështje që është shumë e ndjeshme.

Ndërsa, Ela Elezi eksperte nga Gjykata Kushtetuese e Shqipërisë, tha se Shqipëria njihet si vend burimi e sidomos vend transiti. Sipas saj, në vitet e fundit, për shkak të luftës së fundit në Siri, Irak, Sudan e vende të tjera, të rekrutuarit janë drejtuar nga trafikantë shqiptarë me qëndrim në Greqi e Turqi.

“Këto grupe shqiptarësh të rekrutuar kanë shkuar në Siri e Irak dhe janë bashkuar në luftë lëvizjeve ekstremiste. Nisur nga kjo gjendje, marrja e masave organizative është përqendruar në krijimin e koordinatorit të ri kombëtar anti-trafikim dhe ngritjen e një taskforce për të përmirësuar bashkë veprimin e policisë, prokurorisë e gjykatës”, tha ajo citon RTK.

Ndërkaq, Ali Bajgoram, dekani i Kolegjit Evropian të Kosovës, shpreson që kjo konferencë rajonale, që kishte edhe pjesëmarrës të ambasadave ndërkombëtare që veprojnë në Kosovë, të jetë një mësim i mirë në parandalimin e kësaj dukurie në vendin tonë.

Ndryshe, brenda pesë viteve të fundit më shumë se 70 mijë qytetarë të Kosovës kanë kërkuar azil në vendet e Bashkimit Evropian. Ndërsa vetëm vitin e fundit rreth 20 mijë kosovarë janë regjistruar në listë e azilkërkuesve. Kështu tregojnë shifrat e Raportit të EASO-s (Zyrës Mbështetëse Evropiane për Azil), të publikuar me 7 korrik 2014.

Mirëpo, sipas EASO, gjasat që një qytetar i Kosovës të marrë statusin e azilantit në shtetet anëtare të BE-së është zero për qind, pasi që Kosova është një vend i sigurt dhe aplikimi i konventave për mbrojtje ndërkombëtare për qytetarët kosovarë nuk vlen. Mësohet se gjatë viti 2013 në Kosovë janë kthyer rreth 5100 qytetarë kosovarë.

Sipas statistikave në vendet e BE-së në vitin 2009 kanë kërkuar azil: 14275, në vitin 2010- 14 310, në 2011 janë  9 880, në vitin 2012 – 10210 dhe në vitin 2013 kanë kërkuar azil 20225.