Lucerni do të votojë për heqjen e frëngjishtes nga shkollat

Në tekstin e iniciativës për referendum nuk përmendet se për cilët gjuhë të huaja është fjala, ndonëse nënkuptohet se bëhet fjalë për frëngjishten

Rrugës së disa kantoneve tjera gjermanishtfolëse që tashmë kanë vendosur ose janë në proces të vendosje për heqjen nga programi mësimor të gjuhës frënge, pritet t`i bashkohet edhe Kantoni i Lucernit. Në këtë kanton populli do të votojë në referendum nëse në të ardhmen në ciklin e ulët të shkollës fillore do të mësohet vetëm një gjuhë e huaj ose sikur sot, gjuha angleze dhe ajo frënge. 

Iniciativën për referendum e ka realizuar një komitet mbipartiak, ndërsa në tekstin e iniciativës nuk përmendet se për cilët gjuhë të huaja është fjala, ndonëse nënkuptohet se bëhet fjalë për frëngjishten.

Sipas përmbajtjes së iniciativës, duke mësuar vetëm një gjuhë të huaj, nxënësit do të përmirësonin njohuritë e tyre në atë gjuhë dhe njëkohësisht do t`i jepej më shumë prioritet mësimit të gjuhës gjermane. Në këtë mënyrë, orët e mbetura pas heqjes së gjuhës së dytë të huaj do të shfrytëzoheshin për mësimin e lëndëve të shkencave natyrore.

Ministri i arsimit Alain Berset, duke parë tendencat e kantoneve gjermanishtfolëse drejt heqjes së gjuhës frënge nga planprogramet ka paralajmëruar veprimin e federatës në parandalimin e kësaj. Ndonëse mundësitë ligjore për të bërë një gjë të tillë qeverisë nuk i mungojnë, fjalën e fundit megjithatë do ta thotë populli në referendum.