Kurbanët mund të theren, s’ka rrezik nga sëmundjet

Sëmundja e deleve dhe dhive që ka prekur Kosovën e njohur si “Gjuha e Kaltër” nuk ka pasoja tek njerëzit. Agjencia e Ushqimit jep leje për therje të kurbanëve

Delet e sëmura me “gjuhën e kaltër” i kanë vënë në sprovë besimtarët myslimanë në Kosovë, të cilët po hezitojnë të blejnë dele për kurban, nga frika se kjo sëmundje që po i mbyt delet dhe dhitë, mund të jetë me pasoja edhe për njerëzit. Mirëpo zyrtarët e Agjencisë së Ushqimit dhe Veterinarisë thonë se nuk ka asnjë rrezik nga kjo sëmundje.

Zëdhënësi i AVUK-ut, Lamir Thaçi theksoi se përkundër shfaqjes dhe pranisë së kësaj sëmundje, nuk ekziston as një rrezik për shëndetin e qytetarëve, raporton RTK.

“Sëmundja nuk është ngjitëse, është virusale dhe nuk transmetohet nga kafsha tek kafsha dhe as nga kafsha tek njeriu. Therja e kurbaneve është e lejuar, por ajo duhet ti përmbahet kushteve higjienike dhe të bëhet në thertore të licencuara sipas ligjit”, thotë Thaçi nga Agjencia e Ushqimit dhe Veterinarisë.

Rasti i parë i sëmundjes “Gjuha e kaltër” është shfaqur me 22 gusht në Kosovë dhe është konfirmuar më 10 shtator. Sëmundja përhapët përmes mushkonjës, kurse është karakteristikë për vendet e ulët dhe më pak për zonat në lartësi mbidetare, për shkak të kushteve klimatike.

Sëmundja së pari ishte shfaqur në Serbi, Maqedoni dhe Shqipëri, kurse në Kosovë ishte paraqitur fillimisht në zonat kufitare. Deri më tani në Kosovë janë prekur 1120 krerë dele, kurse prej tyre kanë ngordhur 157 krerë në disa komuna. Komunat më të prekura janë Vitia, Kamenica, Prishtina dhe Podujeva.