Jepet në Poloni shfaqja kosovare “Shembja e Kullës së Ajfelit”

“Shembja e Kullës së Ajfelit” është prodhim i Qendrës Multimedia dhe ka pasur premierën në Teatrin Kombëtar të Kosovës në dhjetor të vitit të shkuar

Të enjten, më 23 tetor, duke filluar nga ora 19.00 në Olsztyn të Polonisë jepet shfaqja “Shembja e Kullës së Ajfelit”, në regji të Blerta Nezirajt. Shfaqja merr pjesë në Festivalin Ndërkombëtar të Teatrit “Demoludy.

“Shembja…” në këtë festival do të shfaqet në skenën kamertale të “Teatr im. Stefana Jaracza”.

“Shembja e Kullës së Ajfelit” është prodhim i Qendrës Multimedia dhe ka pasur premierën në Teatrin Kombëtar të Kosovës në dhjetor të vitit të shkuar.

Në shfaqjen me tekst të shkruar nga dramaturgu Jeton Neziraj, luajnë aktorët: Adrian Morina, Ernest Malazogu, Shengyl Ismaili e Armend Ismajli. Koreografë: Violeta Vitanova  e Stanislav Genadiev. Kukullat dhe hijet: Clément Peretjatko. Kompozitor: Gabriele Marangoni. Dizajni i skenës dhe dritave: Nico de Rooij. Kostumografe: Marija Papucevska. Dramaturge: Borka Pavićević.

Në shfaqje, në një tablo bashkëkohore urbane, rrëfehet historia e çuditshme e një europiani i cili kidnapohet nga dy terroristë islamistë për shkakun se ai këmbëngul që t’ua heqë mbulesën nga koka grave myslimane në Paris. Ndërkohë, si në një përrallë nga e kaluara, në një rrëfim paralel, një ushtar otoman merr urdhër nga Sulltani që t’u shpërndajë mbulesa grave ballkanase, të sapo konvertuara në Islam. “Shembja e Kullës së Ajfelit” është një alternativë ndaj fiksimit të mediave kryesore për mbulesën; drama hap debatin për çështjen më thelbësore – ta njohësh dhe ta kuptosh dramën e tjetrit.