Mbi 20 mijë azilkërkues për 10 muaj

Deri në fund të tetorit kanë kërkuar azil 20540 persona që është numër i përafërt me atë të azilkërkuesve të gjithë vitit 2013, kur ishin regjistruar 21465 kërkesa azili

Në Zvicër, në periudhën e deritashme të këtij viti është shënuar një rritje e numrit të azilkërkuesve. Deri në fund të tetorit kanë kërkuar azil 20540 persona që është numër i përafërt me atë të azilkërkuesve të gjithë vitit 2013, kur ishin regjistruar 21465 kërkesa azili.

Krahas rritjes së kërkesave për azil është rritur edhe numri i pranimit, ose njohjes së tyre, bën të ditur Zyra Federale për Migracion (BFM). Nëse në vitin 2013 kuota e atyre që u ishte pranuar azili ishte 15.4 për qind, në periudhën deri në tetorin e  vitit 2014 kjo kuotë është ngritur në 24.8 për qind. Fjala është për përgjigjen pozitive që për kërkesën e tyre të bërë për azil, refugjatët e kanë marrë në instancën e parë.

Ndërkaq, sipas BFM-së është zvogëluar numri i kërkesave për azil nga vendet “e sigurta”, për të cilat zhvillohen procedura të shkurta dhe refuzohen pothuajse pa përjashtim.