7 vjet e gjysmë burg shqiptarit për tentimvrasje të bashkëkombësit

Dënimi relativisht i ulët në krahasim me kërkesën e prokurorisë arsyetohet me faktin se familja e viktimës ia ka falur familjes së dorasit, gjegjësisht ka hequr dorë nga hakmarrja

Një shqiptar i ri 23 vjeç në Krefeld të Gjermanisë është dënuar nga gjykata e landit në këtë qytet me 7 vjet e gjysmë burg për tentimvrasje. Prokuroria kishte kërkuar dënimin maksimal, të përjetshëm për të riun i cili duke shkrepur shumë herë me revole i kishte shkaktuar plagë bashkëkombësit të tij 28 vjeç, pronar i një klubi kulturor shqiptar. “Nuk tolerohet vetëgjyqësia në rrugët tona” ka thënë prokurorja në fjalën e saj, duke kërkuar dënimin në fjalë.

Dënimi relativisht i ulët në krahasim me kërkesën e prokurorisë arsyetohet me faktin se viktima ka thënë se familja e tij ia ka falur familjes së dorasit, gjegjësisht janë pajtuar. Familja e të dëmtuarit ka hequr dorë nga hakmarrja.

Shkak i zënkës që është përshkallëzuar në tentimvrasje ka qenë një konflikt në mes të familjeve, shkruan rp-online.de. Vëllai i viktimës dhe ai i dorasit ishin zënë rreth blerjes së një automjeti.