Nisin nga prilli fluturimet direkte Shkup-Gjenevë

Fluturime direkte nga Shkupi për në Gjenevë do të fillojnë nga prilli i 2015-ës, për shkak të rritjes së numrit të udhëtarëve ndërmjet Maqedonisë dhe Zvicrës.

Aeroporti i Shkupit po përgatitet për zgjerimin e rrjetit në destinacione të reja me “Swiss” për në Gjenevë. Aeroporti i Shkupit do të lidhë Gjenevën në Zvicër me fluturime të drejtpërdrejta në të dy drejtimet nga prilli 2015.  Përveç Cyrihut dhe Bazelit, Gjeneva do të jetë destinacioni i tretë në një vend evropian që aeroporti i Shkupit do të ketë lidhje ajrore.

„Ne mirëpresim vendimin e „Swiss Airlines“ që nga prill përsëri të fluturojnë nga Gjeneva për në Shkup. Ky është një lajm i mirë për mërgimtarët tanë në Zvicër, si dhe komuniteti i biznesit në të dy vendet”, ka thënë Zoran Krstevski, drejtor i përgjithshëm i “TAV Maqedonia”.

Sipas orarit të fluturimeve të verës, fluturimi i parë nga Shkupi për në Gjenevë është planifikuar për katër prill 2015. Kompania ajrore „SWISS“ do të operojë nga aeroporti i Shkupit çdo të shtunë nga ora 18 e 20 minuta. Gjatë sezonit veror “SWISS” do të udhëtojë këtë rrugë dy herë në javë, të martën dhe të shtunave.

„Ne jemi të kënaqur që mund të përgjigjemi pozitivisht ndaj nevojës në rritje për të udhëtuar ndërmjet Maqedonisë dhe Zvicrës dhe për të nisur një shërbim të ri nga aeroporti i Shkupit për në Gjenevë”, tha Bernard Vodl, drejtor i “Swissit” për Austri dhe Evropën Qendrore e Lindore.

Aeroporti i Shkupit për vitin e ardhshëm ka planifikuar futjen e më shumë destinacioneve të reja, duke rritur frekuencën e rrugëve ekzistuese, si dhe përmirësimin e shërbimit të përgjithshëm ofruar për të dy aeroportet. Për në Gjenevë, sipas “Swiss” biletat mund të rezervohen nga mesi i janarit në faqen e internetit: swiss.com dhe përmes agjencive të udhëtimit.