Tejkalon autoambulancën, ndërsa nget makinën me patentë të pavlefshme

Në natën e të enjtes, shoferi kosovar nga Lüdenscheid u shndërrua në një rrezik për pjesëmarrësit në trafik, duke ndërruar me shpejtësi korsitë

Përveç që po zhvillonte shpejtësi jashtëzakonisht të lartë, 19-vjeçari nga Kosova nuk kishte as patentë shoferi të vlefshme, shkruan dpa.de. Gjatë ngasjes së tij të çmendur, ai madje ka tejkaluar një autoambulancë në qendrën e qytetit të Dortmundit, duke bërë manovrime derisa më në fund policia arriti ta tërhiqte nga trafiku.

Në natën e të enjtes shoferi nga Lüdenscheid u shndërrua në një rrezik për pjesëmarrësit në trafik, duke ndërruar me shpejtësi korsitë dhe duke bërë  “sllallom” në mes të makinave, transmeton albinfo.ch. E gjithë kjo ka ndodhur duke i dhënë makinës më shumë se 100 kilometra në orë. Kur policët e ndaluan, ai, sipas tyre, kishte treguar “zero kuptim” për kontrollin, njofton policia.

Policët i konfiskuan makinën dhe patentëshoferin e lëshuar në Kosovë, i cili është i pavlefshëm në Gjermani. Duke qenë se shoferi i ri ishte duke qëndruar në Gjermani për më shumë se gjashtë muaj, ai ishte i detyruar ta dorëzonte në polici patentën e tij për ta rishikuar, gjegjësisht për ta vazhduar, përcjell albinfo.ch. Ndaj tij janë iniciuar hetime nën dyshimin për gara të paligjshme të makinave.

---