Gjermanishtja, gjuha kryesore e punës në BE

Gjuha gjermane duket se do të jetë gjuha kryesore e punës, menëherë pas daljes së Britanisë së Madhe nga BE-ja.

Është bërë e ditur se Sekretari i Përgjithshëm i Partisë së Lirisë austriake, Herbert Kickl, vlerësoi se gjuha gjermane duhet të jetë gjuha kryesore e punës në BE.

Ai e vlerësoi këtë për shkak të tërheqjes së Mbretërisë së Bashkuar nga BE-ja, transmeton KosovaPress.

Vlen të theksohet se Kickl tha se pas Brexit, BE-ja duhet të konsiderojë një rend të ri të gjuhëve të punës.

“Anglishtja aktualisht është gjuha më e rëndësishme e punës në BE. Frëngjishtja dhe gjermanishtja janë zyrtarisht të lidhura, por në realitet ato nuk përdoren aq shumë, as në të folur, as në dokumente të shkruara“, tha Kickle.

Po ashtu ai tha se pas Brexit, vetëm një për qind e qytetarëve të BE-së kanë anglishten si gjuhën e tyre amtare – Irlanda dhe Malta.

“Prandaj, është logjike për mua që gjuha gjermane të vendoset të paktën në të njëjtin nivel përdorimi në negociatat dhe dokumentet e BE-së sikurse gjuha angleze. Pas një zgjidhjeje kalimtare për Brexit, bazuar në përfaqësimin e gjuhës amtare, gjermanishtja duhet të marrë një rol udhëheqës në familjen e gjuhëve të punës në BE”, tha Kickl, përcjell albinfo.ch.

---